तुळजाराम चतुरचंद महाविद्यालय, बारामती येथे दि. २३ व २४ सप्टेंबर २०२२ या दिवशी कविवर्य मोरोपंत आंतरमहाविद्यालयीन वक्तृत्व व वादविवाद स्पर्धेचे आयोजन करण्यात आले आहे. मोरोपंत, पंडिती काव्यप्रकारातील सर्वश्रेष्ठ कवी म्हणून ओळखले जातात. मोरोपंतांच्या कार्याचा गौरव व्हावा व येणाऱ्या पिढीला त्यांच्या लिखाणाची ओळख व्हावी या उद्देशाने सन १९७२–७३ साली बारामती नगरपरिषदेने तुळजाराम चतुरचंद महाविद्यालयाच्या सहकार्याने मोरोपंतांच्या नावे वाद-विवाद व वक्तृत्व स्पर्धा प्रथम आयोजित केली. त्यानंतर दरवर्षी तुळजाराम चतुरचंद महाविद्यालय या स्पर्धेचे यशस्वीरीत्या आयोजन करीत आहे. सन २०२२-२३ हे या स्पर्धेचे ४९ वे वर्ष आहे. संपूर्ण महाराष्ट्रात प्रसिद्ध असलेल्या या स्पर्धेतून आजपावेतो अनेक नामवंत वाक्पटू तयार झालेले आहेत. अविनाश धर्माधिकारी, अरुण ढेरे, समीरण वाळवेकर व अभिराम भडकमकर इ. हे या स्पर्धेचे माजी विजेते आहेत. ही राज्यस्तरीय स्पर्धा जिंकणे म्हणजे आपल्या वाद-विवाद व वक्तृत्व कलेला सर्वोत्कृष्ठतेचा किताब मिळणे असे आज समीकरणच झाले आहे. करोना महामारीनंतर प्रत्यक्ष सभागृहात ही स्पर्धा आयोजित करताना महाविद्यालयास विशेष आनंद होत आहे. कनिष्ठ व वरिष्ठ अशा दोन स्वतंत्र गटात ही स्पर्धा आयोजिलेली आहे. अधिक माहितीसाठी इच्छुक स्पर्धकांनी स्पर्धेचे कार्याध्यक्ष डॉ. शशांक माने यांच्याशी ९७६३८६५५५६ या क्रमांकावर संपर्क साधावा.
